Quasernet de viatge : Isla Maurici


Anatz legir una revirada realizada per la classa de tresena en seccion bilinga al collègi Albert Camus de La Barraca (12) dins l’encastre d’una sequéncia escolara dedicada al raconte d’un viatge. Un grand mercés per aquesta polida collaboracion a : Auriane ANDRIEU, Arthur BERTHOUMIEUX, Maëva BOUSSAGUET, Manon CALVET, Baptiste COUSTY, Romain DAURES, Maxime DE CONQUAND, Logan DELAGNES, Thibault ESTEVENY, Lucas FLOTTES, Nathan GENIEZ, Jérémy LAURENS, Ambre LE QUELLENNEC, Wilfried MOISAN, Loan PELISSIER, Noémie PUECHGUIRAL-MALICORNES, Yanis RUELLE, Guillaume SUDRE, Marius VABRE, e lor professora Prescillia MOUSSON.

*******

Adieu a totas e a totes,

Aprèp las Comòras, arribam doncas a Maurici. Una isla de talha del departament de las Ivelinas qu’es plan coneguda per sas activitats toristicas. Lo torisme reprensenta una larga partida de l’economia mauriciana e es plan visible (tot es aquí per aculhir de nombroses toristas, ostalariás, vilàs, tors operators, busses a logar, guidas, un grand nombre d’activitats etc…). Las ressorgas energeticas son egalament nombrosas ; solelh, vent, cascadas, etc. Es un contèxt fòrça diferent que nos espèra aquí !


Per poder intervenir dins las escòlas a Maurici, nos cal l’autorisacion del govèrnament. Es fòrça encadrat : nòstras activitats devon durar 70 minutas al maximum (2 periòdes de classa). A nòstra arribada sus plaça, l’autorisacion es pas encara balhada e las vacanças escolaras apròchan. Deurem finalament esperar un mes abans de poder començar la partida animacion dins las escòlas. Aprofiecham del relambi per far lo punt sus nòstra experiéncia a las Comòras, rescontrar nòstres punts de contact a la COI (que es basada a Maurici) coma èra previst al despart del projècte per poder l’afinar, prene coneissença del contèxt energetic de l’isla e crear de novèlas activitats pedagogicas. Mas tanben s’ocupar de nòstre material que seguís en fret e avèm pas acabat de nos estonar amb aquò !


Exemples d’escòlas de la ret Eco-school, los escolans meton en plaça de projèctes divèrses coma la recuperacion d’aiga de pluèja o de jardins de plantas endemnicas.


Es bon, avèm l’autorisacion per intervenir dins las escòlas primàrias e secondàrias del malhum de Eco-school qu’an obtengut lo « Green Flag ». Las Eco-schools an un malhum internacional d’escòlas que s’investisson dins las tematicas ligadas a l’ecologia al sens larg. A travèrs los projèctes cada realisacion deu èsser menada e encadrada pels escolans. Los projèctes devon abordar al mens una demest dètz grandas tematicas : l’ecologia, l’aiga, dels degalhs, la biodiversitat, un mòda de vida sana, l’environament, la qualitat de l’aire e del sòl, lo patrimòni, lo cambiament climatic, la preservacion dels oceans e de las còstas. Cada escòla dispausa d’un « grade » correspondent a son nivèl d’implicacion dins lo biais del projècte Eco-school. Lo « Green Flag » es lo mai naut grade del malhum, necessita d’aver ja completat mai d’un projècte sus las tematicas del malhum, anam doncas rescontrar las escòlas que son las mai avançadas e dont los escolans son los mai sensibilizats a las tematicas ecologicas. L’energia demòra çaquelà l’un dels tèmas los mens causits, los projèctes realizats son majoritariament ligats a l’aiga (los projèctes de recuperacion e del filtratge de l’aiga e de pluèja especialament), a la gestion dels degalhs (mesa en plaça de la tria dels degalhs gerida pels escolans) o a la preservacion de l’environament.


Intervencion davant los professors e representants de las escòlas de la ret Eco-school.

Los professors aicí realizan regularamant de formacions pendent los periòdes de vacanças. Nòstre primièr rescontre amb eles se faguèt doncas al benefici d’una d’aquestas sessions de formacion, organisada dins lo cadre del malhum Eco-school, a la qual se sèm grefats. Lor presentam nòstre projècte e ensajam de comprene lors atentas pedagogicas sul subjècte de l’energia.


Los Mauricians parlan fòrça de « Green Flag» pas de «Drapèl Verd». Al delà d’aquel cas particular, los mauricians an pas cap de problèma a mesclar las lengas d’un biais general ! Aquí parlam l’anglés (la lenga oficiala, los corses son en anglés dins las escòlas), lo creòla, lo francés, de lengas indianas e chinesas. Meteis que la discussion se fa sovent en francés, de mots en anglés s’inseran sovent naturalament, coma «sorry», «ok right», «bye». En fach, i a de nombroses grops a Maurici, sortida de l’istòria d’aquesta isla e èrsas d’imigracion : los indians, los creòles, los chineses, etc. Aquestes grops se mesclan pauc o pauc, e trobam de fach encara de disparetats culturalas e religiosas de còps plan visiblas e marcadas, çò que crea de vilas cosmopolitas surprenentas per una pichona isla !




Nòstras intervencions dins las escòlas èran fòrça instructivas per nosautres a totes los nivèls. Sèm anats dins un quinzenat d’escòlas per escambiar amb d’escolans de 8 a 18 ans suls enjòcs energetics de lor isla. Per los mai joves, nòstra activitat es focalisada sus lo fonccionament de l’electricitat a Maurici e sus las diferéncias qu’existisson segon la sorga d’energia utilisada per en obténer. Permet d’experimentar e de se rendre compte dels profièches e dels inconvenients que procuran cada sorga d’energia.


Visita del site eolian de la Planas de las Ròcas.



Visita de la centrala mixta Carbon/Bagasse d’Omnicane.

Per resumir lo contèxt energetic de l’isla, l’electricitat es produsida a 80 % a partir d’energias fossilas importadas (idrocarburs e carbon) e 20 % a partir d’energias renovelablas (14 % de bagassa, 5 % d’idrolic e 1 % d’eolian e de solar). La bagassa es una particularitat fòrça interessanta, s’agís de residús de cana de sucre aprèp extraccion del sucre que pòt èsser brutlat dins las centralas a carbon. Doncas quand es la sason, la bagassa ven remplaçar lo carbon per produsir de l’electricitat. Las usinas de sucre an trobat aquel mejan de diversificacion de lors activitats e son doncas vengudas d’actors energetics. Mas las surfaças de canas de sucre son a demesir dempuèi mantunas annadas del fach del prètz fòrça bas del sucre que permet pas mai a l’activitat d’èsser rendable, sens comptar la pression foncièra ligada a l’aumentacion del torisme de còps fòrta segon los endreches concernats de l’isla. Nos podèm doncas interrogar sus l’avenir d’aquestas centralas a carbon/bagassa…


Visita de l’interior de las tèrras e d’un ostal autonòm en energia e en aiga.

Amb los mai grands avèm fach la causida d’orientar nòstra animacion sul tèma de la transicion energetica en s’apuejant sul subjècte dels transpòrts qu’es un dels enjòcs energetics majors sus aquesta isla (coma dins bravament d’autres païses) : representa 50% del petròli consomat, doncas importat. A travèrs una version revisitada del jòc de l’esparvièr, avèm menat diferentas discussions suls fenomèns d’inercia del cambiament, de l’impact dels comportaments, dels enjòcs de nòstres mejans de tranpòrts e d’utilisacion de l’energia en general dins nòstre vida quotidiana e a l’escala planetària, dels impacts sul rescalfament climatic, etc. Nòstre testimoniatge, apiejat suls imatges e videòs de nòstre torn de França a velò solar (a deca d’aver pogut lo menar dusca davant eles) a agut lo merite de los far somiar e, esperam, de los motivar a venir actors de la transicion a lor torn !


La màger part de las escòlas secondàrias (collègi/licèu) son pas mixtas (a esquèrra una escòla de dròllas ; e a drecha una escòla de dròlles).

Nòstras activitats e nòstre tesmoniatge de çò qu’avèm fach en França son estat plan recebuts tan plan pels professors que pels escolans. Nos motiva a butar lo concèpt mai luènh encara e soscam ja a de novèlas idèias de jòcs a botar en plaça pendent nòstras animacions sus las islas venentas.



Quant a nòstre material… Figuratz-vos qu’aprèp un pichon torn dempuèi Moroni fins a Johanesburg e 3 setmanas d’atenta sus plaça, nòstres cars amics en carga del fret aerian se son renduts compte qu’avián mal legit la LTA (la ficha descriptiva de la mercandisa a transportar) e qu’èran pas en mesura de perseguir lo transpòrt de nòstre material fins a Maurici alara que nos aprestam a nos rendre a Madagascar, nòstre material es a tornar far lo camin qu’aviam fach… a las Comòras ! 😀 Sèm pas fòrça contents… Nos dirigissèm doncas cap a una novèla isla sens comptar la dessús e prestes a crear de novèlas activitats ! 🙂

A lèu per la seguida de nòstras peripecias dins l’Ocean Indian ! 😉

 

La còla SolaR’hythm